Нималана изьватас

Ануфриев Ефим Евсеевич (1897-1970) – партийнӧй уджалысь, гражданскӧй войнаса участник да советскӧй власьт сувтӧдӧмын пай пуктысь. Чужліс Гам грездын. 1918 вося лӧддза-номъя тӧлысьӧ пырис ВКП(б)-ӧ “Стелла Поларе” вӧр пилитан заводын. 1920-1928 воясӧ вӧлі партиялӧн Печӧраса и Изьва-Печӧраса укомын секретарӧн, 1928-1930 воясӧ – Коми облисполком бердын Войвыв Комитетӧн веськӧдлысьӧн, 1934-1957 воясӧ уджаліс видз-му овмӧсын веськӧдлан постъясын Урал заводъяс да фабрикаяс могмӧдӧм кузя. Сӧветъяслӧн 9-ӧд Ставроссияса съездса депутат. Ӧшмӧс.

Артеев Григорий Митрофанович (30.11.1907-26.02.1972) – партийнӧй да общественнӧй удж вӧчысь. Чужліс Варыш грездын. ВКП(б)-са член 1931 восянь. 1930 воӧ помаліс Коми обласьтса совпартшкола, 1945 воӧ – ЦК ВКП(б) бердын парторганизаторъяслысь высшӧй школа. 1930 восянь уджаліс пропагандистӧн, инструкторӧн, ВКП(б)-лӧн Кулӧмдінса да Изьваса райкомын юкӧнӧн веськӧдлысьӧн, партиялӧн Сыктыв да Шойнатыса райкомъясын медводдза секретарӧн. 1939 восянь уджаліс ВКП(б) обкомса аппаратын. 1948 восянь – облсовпрофӧн веськӧдлысь, 1958 восянь – Коми совнархозын веськӧдлан удж вылын. 1961 восянь – союзнӧй тӧдчанлуна персональнӧй пенсионер. СССР-са 2 да 3 созыва Верховнӧй Сӧветса депутат, Коми АССР-са Верховнӧй Сӧветса депутат (1947 восянь), ВКП (б) обкомса член (1940-1960), партия обкомлӧн бюроса член (1948-1958). Наградитӧма Айму вӧсна Ыджыд тышын 1 тшупӧда орденӧн (1946) да Уджвывса Гӧрд Знамя орденӧн (1957). Ӧшмӧс.

Братенков Николай Терентьевич (27.12.1949) – общественнӧй удж вӧчысь да политик. Чужис Изьва сиктын. 1971 восянь уджаліс физика велӧдысьӧн. Уджаліс Кипъёвса шӧр школаын внекласснӧй удж кузя завучӧн,1977-1983 воясын вӧлі директорӧн. Вӧлі КПСС-са Изьва райкомын инструкторӧн да отделӧн веськӧдлысьӧн, Вӧр-ва видзӧм кузя районса комитетӧн веськӧдлысьӧн, вӧлі район Сӧветса депутатӧн, Республикаса Верховнӧй Сӧветса депутатӧн (1990-1995), Коми Республикаса Каналан Сӧветса депутатӧн (1995-1999, 2020-2025). Уджавліс Изьва районса администрацияӧн веськӧдлысьӧн (1993-1999), Изьва ДРСУ начальникӧн (1999-2003), «Изьва район» МО администрацияса юралысьӧн (2003-2007). Сылы сетӧма «Заслуженный работник Республики Коми» ним. Зэв зіль общественник, Печӧра мездан Комитетын Изьва район серти координатор, «Изьватас» ДӦӦ-са президиумӧ пырысь. Ӧшмӧс.

Витязев Василий Архипович (1910-1984) – — канморт. Чужліс Мокчой сиктын. 1928 воӧ пырис велӧдчыны Сыктывкарса педагогика техникумӧ. 1932 воын босьтіс социолог диплом. Веськӧдліс Помӧсдінса и Гамса колхозын том уджалысь школаясӧн, веськӧдліс РОНО-ӧн Кулӧмдінын да Мылдінын. 1939 воын пырис КПСС-ӧ, сійӧс ыстісны партийнӧй удж вылӧ. Айму вӧсна Ыджыд тышса участник. Демобилизация бӧрын уджаліс партия обкомын. Пырис велӧдчыны ЦК КПСС бердын Высшӧй партийнй школаӧ Москваын. 1952 восянь заводитіс юрнуӧдны Сыктывкарын партия обкомлӧн административнӧй да вузасян-сьӧм органъяс отделӧн. Юрнуӧдіс Коми АССР-са йӧзӧс социальнӧя могмӧдан министерствоӧн. Ӧшмӧс. 

Рочев Иван Алексеевич (22.10.1906-24.08.1980) – Коми АССР-са Верховнӧй Сӧветын президиумлöн юралысь (1945-1949). Чужліс Букур грездын. Вӧлі «Вестник Печоры» газетын редакторӧн да Коми АССР-ын кык районса ВКП(б)-са комитетын медводдза секретарӧн, а 1941 вося йирым тӧлысьӧдз вӧлі ВКП(б)-са Печӧра окружнӧй комитетын медводдза секретарӧн.1943-1944 воясын – скӧт видзӧм кузя ВКП(б)-са Коми областнӧй комитетын секретарӧс вежысь. 1945 восянь 1949 вося лӧддза-номъя тӧлысьӧдз – Коми АССР-са Верховнӧй Сӧветын президиумлöн юралысь, 1949-1950 воясын – ВКП(б)-са Коми областнӧй комитетын мӧд секретар, 1950-1953 воясын – ЦК ВКП(б)/КПСС бердын Высшӧй партийнӧй школаын велӧдчысь, 1953-1955 воясын — Коми АССР-лöн Министръяс Сöветса юралысьӧс вежысь, 1955 вося косму тӧлысьсянь 1959 вося рака тӧлысьӧдз – Коми АССР-са йӧзӧс социальнӧя могмӧдан министр. РСФСР-са Верховнӧй Сӧветса депутат (1947-1951), Коми АССР-са Верховнӧй Сӧветса депутат (1938-1959). Наградитӧма Ленин орденӧн (1946) да Почёт Знак орденӧн (1942). Ӧшмӧс: КР энциклопедия, 2 том, 559 лб.

Ануфриева Валентина Ивановна (08.04.1948) – общественнӧй удж вӧчысь, «Изьватас» сӧветӧн вӧвлӧм веськӧдлысь. Чужис Вуктыл районса Воя грездын. 1968 воын помаліс Нарьян–Марса педучилище, 1972 воын — Коми пединститут. Уджаліс Яран асвеськӧдлан кытшса школаясын, пионервожатӧйӧн Кыдзкарса школаын, ВЛКСМ-лӧн Изьва райкомса секретарӧн школаяс кузя, ВЛКСМ-лӧн Коми Обкомса инструкторӧн, Коми АССР-лöн Министръяс Сöветса-Коми Республикаса Юралысьлӧн администрацияса удж котыртан отделын уджалысьӧн. 1990 воӧ заводитіс юрнуӧдны коми-изьватаслӧн Сыктывкарса землячествоӧн, сійӧс регыд вуджӧдісны «Изьватас» торъя отделениеӧ. «Изьватас»-лӧн витӧд съезд вылын 2003 воӧ бӧрйисны сӧветӧн веськӧдлысьӧн. Стӧч В.И. Ануфриева водзмӧстчӧмӧн вӧліны котыртӧмаӧсь мукӧд регионын, кӧні олӧны изьватас, «Изьватас»-лӧн юкӧнъяс. Медся ёна Ануфриева В.И. майшасис татшӧм мытшӧдъяс йылысь: изьватасӧс этша лыда вужвойтыр лыдӧ пыртӧм, коми кыв видзӧм, изьватаслысь аслыспӧлӧслунсӧ видзӧм, вылыс тшупӧда велӧдчанінъясӧ изьватаслы пырны отсалӧм. Сы отсӧгӧн Изьва районын вӧлі нуӧдӧма енбиа, творчествоа мортлысь во. Ануфриева В.И. наградитӧма «За верность Северу» медальӧн Войвыв войтыр Ассоциациясянь, «За заслуги перед Республикой Коми» отличие знакӧн, сылы сетӧма «Почетный председатель совета «Изьватас» ним. Ӧшмӧс. 

Дегтярева Нина Степановна (27.10.1943) – велӧдысь, профсоюзнӧй, партийнӧй, административнӧй уджалысь, общественнӧй удж вӧчысь. Краевед, турист, турпоход маршрутъяс лӧсьӧдысь, Полюсбердса Из (Приполярный Урал) вылӧ изьватас велӧдчысьяслӧн походъяс медводдза котыртысьяс пиысь ӧти. «Изьватас» коми-изьватас ассоциацияӧн веськӧдлысь 1993-1996 воясын. Н.С.Дегтярева пуктіс ыджыд пай «Луд» гаж лӧсьӧдӧмӧ да котыртӧмӧ, Изьва музей лӧсьӧдӧмӧ. Сылы медводдзаӧн Изьва районын вӧлі сетӧма «Патриот России» медаль. Ӧшмӧс.

Рочев Николай Васильевич (05.12.1962-31.08.2018) – велӧдысь, турист-краеведческӧй удж котыртысь, общественнӧй удж вӧчысь. Чужліс Изьва районса Кыдзкар сиктын. Коми педагогика институтысь естественно-географическӧй факультет помалӧм бӧрын велӧдӧма школаын география, история да удж. Гамса школаын вӧлӧма директорӧс вежысьӧн. Некымын созыв Н. В. Рочев вӧлӧма Изьва район Сӧветса депутатӧн. 2004—2005-ӧд воясын вӧлӧма Изьва район Сӧветса веськӧдлысьӧс вежысьӧн, а 2005-ӧд восянь 2007-ӧд вося лӧддза-номъя тӧлысьӧдз — Изьва районса администрацияӧн веськӧдлысьӧс медводдза вежысьӧн. 2016-2018 воясын вӧлі Изьва районса челядь шӧринын директорӧн. 2010 восянь кувтӧдзыс — «Изьватас» ДӦӦ-ӧн веськӧдлысь. Ӧшмӧс.

Алексюк Владимир Николаевич (02.01.1939-05.09.2018) – математик, физика-математика наукаяс кандидат, профессор, Коми педагогика институтын математика анализ кафедраӧн веськӧдлысь. Чужліс Шелляюр посёлокын. Мешӧр туялан темаяс: мера теория, множествояс теория подувъяс. Ӧшмӧс.

Игушев Евгений Александрович (11.03.1939) – коми кыв туялысь, филология наукаяс доктор, профессор. Чужис Пожня грездын. 1973 восянь уджаліс Сыктывкарсам канму университетын. 1991 воын Тарту университетын дорйис филология доктор ним вылӧ диссертация (коми кывйын морфология категорияяслӧн стилистика). Некымын во велӧдіс коми кыв Уппсала университетын (Швеция). Фин-йӧгра туялысьяслӧн войтыркостса котырӧ пырысь (Хельсинки, Финляндия), Хунгарологъяслӧн войтыкостса котырӧ пырысь (Будапешт, Венгрия). Ӧшмӧс.

Казановский Евгений Степанович (18.02.1938-02.05.2026) – ветеринар наукаяс доктор. Чужис Коми АССР-са Печӧра районлӧн Песчанка посёлокын. 1970 воын дорйис «Изучение токсичности руелена и байтекса для северных оленей» кандидатскӧй диссертация. Уджаліс кӧръяслӧн лӧдзьясысь висьӧмъяс вылын да наысь бурдӧдӧм да видзчысьӧм вылын. Уджалігас йӧзӧдіс 60-ысь унджык туялан статья ветеринария серти. 1990 воын дорйис «Ветеринарно-санитарное обоснование применения фосфорорганических инсектицидов в оленеводстве, их токсичность для оленей и эффективность при эдемагенозе» докторскӧй диссертация. Наградитӧма ВДНХ-лӧн бронза медальӧн, СССР-са Минсельхоз бердын вредительяскӧд, быдмӧг висьӧмъяскӧд да ёгтурунъяскӧд химия отсӧгӧн тышкасьӧм нуӧдан Канму комиссиялӧн аттьӧалӧмӧн, Коми АССР-са Минсельхозсянь, СССР, ВЦСПС и ЦК ВЛКСМ-са, ЦК КПСС-са Министръяс Сӧветсянь, Россия Федерацияса Минсельхозсянь да Россельхозакадемиясянь, Коми Республикаса Минсельхозсянь, а сідзжӧ Северо-Восточнӧй научно-методическӧй шӧринсянь да Коми наука шӧринлӧн видз-му овмӧс институтсянь Почёт грамотаясӧн. Ӧшмӧс, ӧшмӧс.

Канев Виктор Федорович (15.03.1939-10.09.2008) – ученый, педагог, педагогика наукаяс доктор, профессор, педагогика велӧдӧм серти международнӧй наука академияса академик, Россия Федерацияса Вылыс тшупӧда школа нимӧдана уджалысь, Коми Республикаса традиционнӧй ремеслояс кузя мастеръяслӧн котырӧ пырысь, Коми ремесленнӧй палатаын наука сӧветӧн веськӧдлысь. Чужліс Яран асвеськӧдлан кытшса Каратайка посёлокын. 1964-1967 воясын уджаліс велӧдысьӧн Оксино сиктын, сэсся Печӧра районса Гӧрд Яг да Кожва школаясын велӧдысьӧн да директорӧн. 30 во уджаліс Коми канму пединститутын. Ӧшмӧс: КР энциклопедия, 2 том, 59 лб.

Канев Гений Васильевич (06.01.1937-06.04.1992) – ученӧй-экономист, экономика наукаяс доктор, Коми АССР-са наукаса нимӧдана уджалысь. Чужліс кыдзкар грездын. Дорйис «Пути повышения рентабельности совхозного производства» кандидатскӧй диссертация, «Экономические проблемы сельского хозяйства Северного экономического района» докторскӧй диссертация. 1992 воын лоис Коми наука шӧринса Войвылын экономическӧй да социальнӧй мытшӧдъяс институт директорӧн. Ӧшмӧсъяс: КР энциклопедия, 2 том, 59 лб; Люди науки. Серия. Гений Васильевич Канев. Страницы биографии ученого экономиста-аграрника. Сыктывкар, 1993. 34 с.

Кузнецова Татьяна Леонидовна (10.05.1959) – литература туялысь, филология наукаяс кандидат, Коми наука шӧринын Кыв, литература да история институтса литературоведение юкӧдса ыджыдджык туялысь да веськӧдлысь. Чужис Кулим грездын. «Наследие» наука журналлӧн редколлегияӧ пырысь, РГНФ-са экспертнӧй комиссияӧ пырысь, «Войвыв кодзув» журналын йӧзӧдчысь авторъяс костын «Эзысь борд» литературнӧй конкурслӧн жюриӧ пырысь. Ӧшмӧс, ӧшмӧс.

Рочев Николай Никитич (22.05.1922-02.09.2004) – коми история туялысь, история наукаяс кандидат, Коми наука шӧринысь Кыв, литература да история институтса медводдза веськӧдлысь (1970–1985). РСФСР-са культураын нимӧдана уджалысь, Коми АССР-са народнӧй овмӧсса нимӧдана уджалысь. Чужліс Кыдзкар грездын. Веськӧдлӧма Фин-йӧгра туялысьяслӧн VI ставмирса конгресслӧн дасьтӧмӧн да нуӧдӧмӧн. Наградитӧма Айму вӧсна Ыджыд тыш II тшупӧда кык орденӧн, Уджвывса Гӧрд Дӧрапас орденӧн, Гӧрд Дӧрапас орденӧн, «Заслугаясысь эзысь крест» орденӧн (Польша), «Германия вермӧмысь» да «Сталинград дорйӧмысь» медальясӧн, «Вӧрӧг водзын повтӧмлунысь» медальӧн (Чехословакия). Ӧшмӧс: КР энциклопедия РК, 2 том, 559 лб.

Рочев Петр Андреевич (18.10.1913-08.06.1991) – советскӧй учёный, видз-му наукаяс доктор, ВАСХНИЛ-са член-корреспондент. Чужліс Мокчой сиктын. Вӧлі ВАСХНИЛ Президиумса Войвыв мытшӧдъяс серти комиссияса членӧн. Нималана ученӧй Печӧраса войвылын йӧла скӧт видзӧм кузя. Уджавліс наука туялысьӧн скӧт видзӧм серти войвыв краевӧй опытнӧй станцияын. Коми АССР-са Наркомземлӧн Печӧраса видз-му овмӧс опытнӧй станцияса директор (1935–1942). Участвуйтіс Айму вӧсна Ыджыд тышын. Ылі Войвылын видз-му овмӧс серти НИИ-лӧн Нарьян-Марса видз-му овмӧс опытнӧй станцияса директор (1946–1988). РСФСР-са и СССР-са нимӧдана зоотехник. Наградитӧма Александр Невский орденӧн, Айму вӧсна Ыджыд тыш I тшупӧда кык орденӧн, Уджвывса Гӧрд Дӧрапас орденӧн, Гӧрд Звезда орденӧн, Октябрьса Революция орденӧн, Дружбы народов орденӧн. Ӧшмӧс, ӧшмӧс, ӧшмӧс.

Рочев Юрий Герасимович  (07.03.1936-29.10.1995) – коми фольклор да литература туялысь, филология наукаяс кандидат. Чужліс Шурышкар районса Мыжы сиктын. Пырӧдчис «Коми йӧзкостса сьыланкывъяс» куим небӧга удж (1966, 1968, 1971), «Коми литературалӧн история» куим небӧга монография (1980) гижӧмӧ.Ӧттшӧтш В. И. Лыткинкӧд дасьтіс йӧзӧдӧм вылӧ И. А. Куратовлысь гижӧдъяс. Ӧшмӧс, ӧшмӧс.

Сметанин Александр Франсович (24.04.1949-06.12.2010) – история туялысь, история наукаяс кандидат, доцент. Чужліс Кельчиюр сиктын. 1994 восянь — Коми наука шӧринса веськӧдлысьӧс вежысь и тшӧтш 1996 восянь — Коми наука шӧринысь Кыв, литература да история институтса веськöдлысь. Наградитӧма “Дружба народов” орденӧн. Коми Республикаса нимӧдана уджалысь. Кыкысь вӧлі Республикаса веськӧдлан котырлӧн премия лауреат. Сылы сетӧма «Почетный гражданин с. Кельчиюр» ним. Ӧшмӧс, ӧшмӧс.

Ануфриев Александр Захарович (12.09.1923-04.05.2002) – журналист, редактор, партийнӧй уджалысь. Чужліс Мокчой сиктын. Вӧлі «За новый Север» газетын ас корреспондентӧн. Литературнӧй сотрудник, «Красное знамя» газетын юкӧнӧн веськӧдлысь. 1966-1971 воясын вӧлі «Красное знамя» газетын медшӧр редакторӧн. 1974-1986 воясын вӧлі КПСС-са Коми обкомын инструкторӧн. Коми АССР-са Верховнӧй Сӧветса депутат (1966-1970), Коми АССР-са журналистъяслӧн котыр правлениеӧн веськӧдлысь (1966-1970). Сылы сетӧма «РСФСР-са культураын нимӧдана уджалысь» ним (1968). Ӧшмӧс: КР энциклопедия, 3 том, 358 лб.

Артеев Сергей Александрович (22.07.1935 – 03.01.2003) – культработник, самодеятельнӧй композитор, поэт. Чужлӧма Варыш грездын. Сійӧ гижис ставыслы тӧдса сьылынкывъяс «Ижма – радость моя», «Мисс Олимпиада» Р. П. Сметаниналы, «Ижемская шаль» да мукӧд. Ӧшмӧс.

Вокуев Федор Петрович (01.01.1950-21.10.2000) – самодеятельнӧй поэт, композитор. Чужліс Кельчиюр сиктын. Помаліс Нарьян-Марса педучилище, Ленинградса связь электромеханическӧй институт. Уджаліс музыкальнӧй уджалысьӧн Изьвавом (Усьте) школаын, Кельчиюрса да Галфедьса детсадъясын. Гижис 20-ысь унджык челядьлы сьыланкыв, челядьлы шылада мойд, некымын сьыланкыв верстьӧяслы. «Тільгӧ лов пытшкын…» сборниклӧн автор (2000 год). Котыртіс медводдза фольклор коллектив Кельчиюрын, ӧні сійӧ нималӧ став Изьва районын. Ӧшмӧс, ӧшмӧс.

Рочев Василий Прокопьевич (28.06.1952) – коми сьылысь, Коми Республикаса нимйӧза артист, Коми Республикаса нимӧдана уджалысь. Чужис Няшабӧж сиктын. Помаліс Сыктывкарса шылад училишӧлысь сьылан юкӧн. Сьылӧма «Асъя кыа» канму ансамбльын, Коми республикаса шылад театрын, уджалӧма Коми Республикаса филармонияын. 1995 воын лӧсьӧдіс ассьыс ансамбль «Мелi шыяс». Уджалан воясӧ ансамбльыс дасьтіс и сетіс 25 концерта программа Коми сиктъясын да каръясын, Москваын, Финляндияын, Германияын. Уна во чӧж веськӧдліԍ Сыктывкарын изьваса йӧзкостса культура шӧринӧн. Тайӧ шӧринлӧн эм аслас сьылан «Изьва» ансамбль, сійӧс сідзжӧ котыртіс В.П. Рочев. Ӧшмӧс.

Савенко Ольга Николаевна (11.09.1956) – тележурналист, Россия Федерацияса культураын нимӧдана уджалысь, Коми Республикаса культураын нимӧдана уджалысь. Уджалӧ «Коми гор» телерадиокомпанияын тематическӧй вешанньӧ службаса начальникӧн. Чужис Усинск районса Лыжавомын. Коми войтырлӧн традицияяс да культураяс йылысь фильмъяс дасьтӧмысь шедӧдӧма Коми Республикаса канму премия. «Финно-угорский мир» телеуджтасысь сылы сетӧма Коми Республикаса Веськӧдлан котырлӧн премия. Войтыркостса да ставроссияса унасикас телефестивальӧ да конкурсӧ пырӧдчысь. Ӧшмӧс: КР энциклопедия, 3 том, 10 лб.

Ануфриева Альбина Зиновьевна (22.03.1940-23.02.1996) – коми гижысь, изьватас фольклор чукӧртысь. Чужліс Уква районса Косьясдор грездын. 1960—1970 воясӧ некымын во уджаліс Арктикаын войвывса діяс вылын, кӧні и босьтчис гижны. ижӧдъяссӧ торъя небӧгӧн «Майбыр» ним улын йӧзӧдӧма 1989 воын. Ӧшмӧс, ӧшмӧс, ӧшмӧс.

Втюрина Людмила Зарниевна (Зарни Люся) (11.01.1964) – коми гижысь, поэт, 2015-ӧд восянь пырӧ Россияса гижысь котырӧ. Чужис Кельчиюр сиктын. Помалӧма Перымын канмуса культура институтысь библиотека факультет. 1985-ӧд восянь уджаліс Сыктывкарын, С.Я. Маршак нима Коми Республикаса челядьлӧн национальнӧй библиотекаын веськӧдлӧма отделӧн. Йӧзӧдсьӧ 2001 восянь. «Шоныд діяс», «Майбыр кад», «Кывбуръяс», «Тӧвся ӧшкамӧшка», «Олэмлы ода» сборникъяслӧн автор. Коми Республикаса веськӧдлан котырлӧн культураын да искусствоын Канму премия лауреат. Коми Республикаса нимӧдана уджалысь (2015), «Эзысь борд» республикаса конкурслӧн специальнӧй призъяс босьтысь. Наградитӧма «Патриот России» медальӧн. Ӧшмӧс, ӧшмӧс, ӧшмӧс.

Истомин Иван Григорьевич (Сибырак Иван) (07.02.1917-27.07.1988) – коми да яран гижысь, поэт и драматург. Чужліс Мыжы сиктын. Медся тӧдса сылӧн гижӧдъяс — “Живун” роман, “Встань-трава”, “Последняя кочевка”. Ӧшмӧс, ӧшмӧс, ӧшмӧс. 

Никулин Николай Егорович (29.04.1932-1993) – врач, челядьлы гижысь. Чужліс Сыктыв районса Волся сиктын. Унджык олӧмсӧ оліс да уджаліс Изьва районса Вертепын. Медся тӧдса сылӧн гижӧдъяс — “Яндо” повесть, “Тӧлысь вылӧ” сборник. Ӧшмӧс, ӧшмӧс, ӧшмӧс.

Попов Владимир Александрович (В. Санин) (01.01.1934-07.02.1995) – коми гижысь, вуджӧдчысь, СССР-са гижысь котырӧ пырысь. Чужліс Изьва сиктын. Уджавліс Коми республикаса радиоын, Коми небӧг лэдзанінын, вӧлі “Войвыв кодзув” журналын медшӧр редакторӧн. Медся тӧдса сылӧн гижӧдъяс — “Сьылісны бабаяс, сьылісны” поэма, “Педӧр Кирон”, “Мамӧлӧн югыдыс” да мукӧд. Коми комсомол Премия лауреат, Коми АССР-са культураын нимӧдана уджалысь. Ӧшмӧс, ӧшмӧс, ӧшмӧс.

Поташев Александр Борисович (19.05.1971-17.02.2013) – поэт. Чужліс Нарьян-Мар карын, челядьдырсӧ колис Изьвавомы (Усьтеын), велӧдчис Шелляюрса шӧр школаын. 1996 воын водзмӧстчис чукӧртны да йӧзӧдны изьватас поэтъяслысь “Восковые крылья” ӧтувъя сборник. Сылысь гижӧдъяссӧ йӧзӧдісны “Новый север” районса газетын, “Литературнӧй Россия” газетын, “Белый бор” альманахын, “Ижемский характер” сборникын. “Яблоко осени” небӧглӧн автор. Ӧшмӧс.

Рочев Егор Васильевич (07.05.1937-09.10.2012) – тӧдчана коми гижысь, Россияса гижысь котырӧ пырысь. Чужис Большеземельскӧй тундраын, школасӧ помаліс Усвавом сиктын. Вӧлі “Войвыв кодзув” журналын медшӧр редакторӧн. Медся тӧдса сылӧн гижӧдъяс — “Лӧз тундра”, “Митрук петӧ тундраысь”, “Менурей”, “Морттуй” да мукӧд. Ӧшмӧс, ӧшмӧс, ӧшмӧс.

Рочев Яков Митрофанович (Митрук Як) (23.01.1909-03.09.1977) – коми гижысь, вуджӧдчысь, СССР-са Гижысь котырӧ пырысь. Чужліс Уквавом сиктын. Уджавліс велӧдысьӧн, роноса инспекторӧн, “Гӧрд Печера” газетын корреспондентӧн, Коми небӧг лэдзанінын редакторӧн, “Войвыв кодзув” журналын кывкутысь редакторӧн. Медся тӧдса сылӧн гижӧдъяс — “Кык друг”, “Изьва гызьӧ”, “Му вежӧм” романъяс да мукӧд. Ӧшмӧс, ӧшмӧс, ӧшмӧс, ӧшмӧс.

Чупров Яков Иванович (Биа Ӧгыр) (03.06.1906-04.1942) – поэт, журналист, общественнӧй удж вӧчысь. Чужліс Букур сиктын. Вӧлі “Гӧрд Печера” газетын редакторӧн. Медся тӧдса сылӧн гижӧдъяс — “Коньӧр нывлӧн сьылӧм” поэма, “Сальӧ Микулай (Яранъяслӧн мойд)” да мукӧд. Ӧшмӧс, ӧшмӧс, ӧшмӧс.

Артеев Николай Лукич (1901-12.11.1931) – медводдза изьватас-врачьясысь ӧти, комсомольскӧй, хозяйственнӧй деятель. Чужліс Изьва сиктын. Гражданскӧй вӧйна помасьӧм бӧрын уджаліс комсомольскӧй веськӧдлан удж вылын: Изьва-Печӧра крайын комсомоллӧн медводдза ячейкаяс котыртысь, Изьва-Печӧра укомлӧн медводдза секретар, комсомол обкомӧ пырысь. 1925-1930 воясын – медводдза МГУ-са медицина факультетын студент. Велӧдчигӧн прӧйдитіс практикасӧ Изьва райздравотделӧн веськӧдлысьӧн, Мокчойса да Сыктывкарса больничаясын врач-хирургӧн, лыддис лекцияяс санитарно-гигиеническӧй темаяс серти. Университет помалӧм бӧрын Артеев уджаліс Усвавом больничаын веськӧдлысьӧн да хирургӧн, вӧчис зэв уна бур операция, и ни ӧти висьысь эз кув сы киысь. Сійӧс ёна пыдди пуктісны кыдз медик-специалистӧс и кыдз гражданинӧс. 1931 вося йирым тӧлысьын тиф эпидемия дырйи Артеев заразитчис висьысьясысь, и кувсис. Артеевлысь ним сетӧма Усвавомса больничалы. Ӧшмӧс.

Брюшинин Иван Павлович (1892*-1941) – легендарнӧй врач-универсал. Чужліс Архангельск обласьтса Пинежскӧй районлӧн Юрала грездын. 1910 воын помаліс медицинскӧй училище, вит во уджаліс фельдшерӧн Карелияын. Медводдза мировӧй вӧйна дырйи служитіс фельдшерӧн, и сылӧн вӧліны военнӧй наградаяс. 1917 воын помаліс мӧд Московскӧй университетын медицина факультет, и вӧлі ыстӧма уджавны Изьва-Печӧра уездӧ, пуктӧма дзоньвидзалун видзан да хирургия серти уездса отделӧн веськӧдлысьӧн. Брюшинин уна вӧчис, медым бурмӧдны материальнӧй базасӧ уездса больничалысь. Сылӧн ёна корӧм серти 1934 воын больничаӧ вайисны медводдза рентген-аппарат Печӧра крайын. Сійӧ ёна дасьтіс и шӧр медперсоналсӧ. Ӧд уездса больничаӧн могмӧдан мутасыс вӧлі вывті ыджыд, Печӧра увсянь Об ю дорӧдз, тӧвнас больнича дорын чукӧртчывлісны уна сё вӧла да кӧр доддя. Иван Павлович уджаліс Печӧраын 14 во, на пиысь 10 — Изьва районын. Тайӧ кадӧ сійӧ вӧлі уникальнӧй врачӧн – хирургӧн, окулистӧн, гинекологӧн. Аслас уджысь Брюшининӧс пыртӧма Коми обласьтса Удж слава небӧгӧ, наградитӧма «15 во Коми обласьтлы» почёт знакӧн. Ӧшмӧс.

Ануфриев Александр Александрович (10.05.1926 – 26.09.1966) – легкоатлет, котралысь, Олимпийскӧй вӧрсӧмъясын вермысь, СССР-са спортын нимӧдана мастер. Сійӧ босьтіс бронза 1952 вося Олимпийскӧй ворсӧмъясын Хельсинкиын, кӧні сӧветскӧй спортсменъяс медводдзаысь петкӧдчисны, 10000 м дистанция вылын. Сійӧ лэдзис ас водзӧ сӧмын Олимпийскӧй ворсӧмъясын 4-кратнӧй чемпионӧс Чехословакияысь Эмиль Затопекӧс да Францияысь котралысьӧс Ален Мимунӧс, коді вермис марафонсӧ локтан Олимпиадаын. Чужліс Краснобор сиктын. Ӧшмӧс, ӧшмӧс.

Зазерский Виталий Олегович (18.03.1958) – нималӧ ёнджыка кыдз спортсмен-конькобежец, международнӧй класса спорт мастер. Чужис Кыдзкар грездын. 1978 воын вӧлі Россияса абсолютнӧй чемпионӧн зонъяс костын. Абсолютнӧй чемпион СССР-са войтыръяслӧн нёльӧд тӧвся спартакиадаын юниоръяс костын. Монреальын юниоръяс костын мирса чемпионатын эзысь призер (Канада, 1978). Ӧшмӧс: КР энциклопедия, 1 том, 446 лб.

Рочев Василий Павлович (22.12.1951) – лызьӧн нималана коми котралысь, СССР-са чемпионатъясын 12-ысь вермысь, мирса чемпионатъясын мӧд да коймӧд места босьтысь, тӧвся Олимпиадаын (Лейк-Плесид, 1980) зарни да эзысь медальяс босьтысь, СССР-са спортын нимӧдана мастер (1980), Россияса нимӧдана тренер (1998). Чужис Букур сиктын. Ӧшмӧс, ӧшмӧс, ӧшмӧс. 

Сметанина Раиса Петровна (29.02.1952) – нималана лызьöн котралысь, Олимпиада ворсӧмъясын унаысь вермысь, Ставмирса да СССР-са чемпионатъясын лызьöн котралöм серти унаысь вермысь, СССР-са спортын нимӧдана мастер. Чужис Мокчой сиктын. Став нывбаба-котралысь пиысь сылӧн медся уна награда тӧвся Олимпиадаясын (10), сы мында жӧ сӧмын итальянка Стефания Бельмондолӧн. Медводдза спортсменка (кыдз нывбабаяс, сідз и мужичӧйяс костын), коді сяммис босьтны медальяс 5 тӧвся Олимпиада вылын пӧдрад. Раиса Сметаниналысь ним сетӧма Сыктывкарса лызьӧн котралан спорт шӧринлы. Наградитӧма Ленин, Уджвывса Гӧрд Знамя, Дружбы народов, «Знак Почета» орденъясӧн. МОК вӧзйӧм серти Раиса Сметаниналы вӧлі сетӧма Кубертенлысь международнӧй приз. Ӧшмӧс.

Вокуева Зинаида Павловна (10.02.1947) – ас вылӧ уджалысь, туризм котыртысь. Чужис Инта карын. Специальносьт серти агроном, уджаліс “Изьваса” совхозын му вӧдитан бригадирӧн, 1986-1988 воясын вӧлі совхозын медшӧр агрономӧн. 1988 воын велӧдчис Йошкар-Олаын шубно-меховӧй фабрикаын курсъяс вылын, кыдзи дасьтыны куяссӧ да вурны наысь, а бӧрыннас восьтіс совхозын кучикысь вурсян мастерскӧй. 2005 вося йирым тӧлысьын регистрируйтчис ас вылӧ уджалысьӧн да котыртіс Сизябын Базуй инын челядьлы и верстьӧяслы этнотурбаза. Ӧшмӧс, ӧшмӧс.

Терентьев Олег Михайлович (16.01.1961) – бизнесмен. Чужис Краснобор сиктын. Помаліс Ленинградса видз-му институт, менеджеръяслысь Россияса академия. Уджаліс «Красноборса» совхозын (инженерсянь директорӧдз), уджаліс Изьваса РАПО-ын медшӧр инженерӧн. Котыртіс «Изьва» акционер котыр.1995 восянь – «Изьва» АК-лӧн генеральнӧй директор, 1999 восянь – «Изьва» АК-са директоръяслӧн сӧветӧн веськӧдлысь. Сылы сетӧма «Коми Республикаса нимӧдана уджалысь» ним, вӧлі Коми Республикаса Каналан Сӧветса депутатӧн (1995-1999). Ӧшмӧс.