Ӧтйӧза ӧтмунӧмъяс да йӧзкотыр
Ануфриева Валентина Ивановна (08.04.1948) – общественнӧй удж вӧчысь, «Изьватас» сӧветӧн вӧвлӧм веськӧдлысь. Чужис Вуктыл районса Воя грездын. 1968 воын помаліс Нарьян–Марса педучилище, 1972 воын — Коми пединститут. Уджаліс Яран асвеськӧдлан кытшса школаясын, пионервожатӧйӧн Кыдзкарса школаын, ВЛКСМ-лӧн Изьва райкомса секретарӧн школаяс кузя, ВЛКСМ-лӧн Коми Обкомса инструкторӧн, Коми АССР-лöн Министръяс Сöветса-Коми Республикаса Юралысьлӧн администрацияса удж котыртан отделын уджалысьӧн. 1990 воӧ заводитіс юрнуӧдны коми-изьватаслӧн Сыктывкарса землячествоӧн, сійӧс регыд вуджӧдісны «Изьватас» торъя отделениеӧ. «Изьватас»-лӧн витӧд съезд вылын 2003 воӧ бӧрйисны сӧветӧн веськӧдлысьӧн. Стӧч В.И. Ануфриева водзмӧстчӧмӧн вӧліны котыртӧмаӧсь мукӧд регионын, кӧні олӧны изьватас, «Изьватас»-лӧн юкӧнъяс. Медся ёна Ануфриева В.И. майшасис татшӧм мытшӧдъяс йылысь: изьватасӧс этша лыда вужвойтыр лыдӧ пыртӧм, коми кыв видзӧм, изьватаслысь аслыспӧлӧслунсӧ видзӧм, вылыс тшупӧда велӧдчанінъясӧ изьватаслы пырны отсалӧм. Сы отсӧгӧн Изьва районын вӧлі нуӧдӧма енбиа, творчествоа мортлысь во. Ануфриева В.И. наградитӧма «За верность Северу» медальӧн Войвыв войтыр Ассоциациясянь, «За заслуги перед Республикой Коми» отличие знакӧн, сылы сетӧма «Почетный председатель совета «Изьватас» ним. Ӧшмӧс.
Балин Дмитрий Иванович (1796-1865) – коми кресьтянин, коми кресьтяна кыпӧдчӧмъясӧ зіля пырӧдчысь. Унаысь сійӧс сетлісны судӧ да пуксьӧдлісны дзескыдінӧ. Балинлӧн вӧлі зэв тӧдчана пай изьваса кресьтяна 1836-1838 воясся кыпӧдчӧмын. Ӧшмӧс.
Дегтярева Нина Степановна (27.10.1943) – велӧдысь, профсоюзнӧй, партийнӧй, административнӧй уджалысь, общественнӧй удж вӧчысь. Краевед, турист, турпоход маршрутъяс лӧсьӧдысь, Полюсбердса Из (Приполярный Урал) вылӧ изьватас велӧдчысьяслӧн походъяс медводдза котыртысьяс пиысь ӧти. «Изьватас» коми-изьватас ассоциацияӧн веськӧдлысь 1993-1996 воясын. Н.С.Дегтярева пуктіс ыджыд пай «Луд» гаж лӧсьӧдӧмӧ да котыртӧмӧ, Изьва музей лӧсьӧдӧмӧ. Сылы медводдзаӧн Изьва районын вӧлі сетӧма «Патриот России» медаль. Ӧшмӧс.
Рочев Николай Васильевич (05.12.1962-31.08.2018) – велӧдысь, турист-краеведческӧй удж котыртысь, общественнӧй удж вӧчысь. Чужліс Изьва районса Кыдзкар сиктын. Коми педагогика институтысь естественно-географическӧй факультет помалӧм бӧрын велӧдӧма школаын география, история да удж. Гамса школаын вӧлӧма директорӧс вежысьӧн. Некымын созыв Н. В. Рочев вӧлӧма Изьва район Сӧветса депутатӧн. 2004—2005-ӧд воясын вӧлӧма Изьва район Сӧветса веськӧдлысьӧс вежысьӧн, а 2005-ӧд восянь 2007-ӧд вося лӧддза-номъя тӧлысьӧдз — Изьва районса администрацияӧн веськӧдлысьӧс медводдза вежысьӧн. 2016-2018 воясын вӧлі Изьва районса челядь шӧринын директорӧн. 2010 восянь кувтӧдзыс — «Изьватас» ДӦӦ-ӧн веськӧдлысь. Ӧшмӧс.
Семяшкин Иван Афанасьевич (23.12.1883-09.02.1947) – партийнӧй да общественнӧй удж вӧчысь. Чужліс Архангельск губернияса Печӧра уездлӧн Красноборса вӧлӧсьтын. Большевикъяс чукӧр Красноборса вӧлӧсьтын котыртысь да большевик партиялысь Печӧраса уком котыртысьясысь ӧти. Ӧшмӧс: КР энциклопедия, 3 том, 38 лб.