Культура
Ануфриев Александр Захарович (12.09.1923-04.05.2002) – журналист, редактор, партийнӧй уджалысь. Чужліс Мокчой сиктын. Вӧлі «За новый Север» газетын ас корреспондентӧн. Литературнӧй сотрудник, «Красное знамя» газетын юкӧнӧн веськӧдлысь. 1966-1971 воясын вӧлі «Красное знамя» газетын медшӧр редакторӧн. 1974-1986 воясын вӧлі КПСС-са Коми обкомын инструкторӧн. Коми АССР-са Верховнӧй Сӧветса депутат (1966-1970), Коми АССР-са журналистъяслӧн котыр правлениеӧн веськӧдлысь (1966-1970). Сылы сетӧма «РСФСР-са культураын нимӧдана уджалысь» ним (1968). Ӧшмӧс: КР энциклопедия, 3 том, 358 лб.
Артеев Сергей Александрович (22.07.1935 – 03.01.2003) – культработник, самодеятельнӧй композитор, поэт. Чужлӧма Варыш грездын. Сійӧ гижис ставыслы тӧдса сьылынкывъяс «Ижма – радость моя», «Мисс Олимпиада» Р. П. Сметаниналы, «Ижемская шаль» да мукӧд. Ӧшмӧс.
Валеев Григорий Никифорович (Гора Гриш) (1878-1980) – нималана коми сказитель, колва яран. Роч да яран кывъяс эз тӧд. Чужліс Большеземельскӧй тундраын. Изьва-колва эпос сьыланкывъяс сьылысь, ёнджыкасӧ радейтіс сьывны и мукӧд эпизодсӧ шуалӧмӧн комментируйтны. Медся тӧдса сьыланкывъясыс: “Керча ю кӧзяин”, “Ыджыд Обдорӧ ветлӧм”, “Сизим арӧса зон” да мукӧд. Ӧшмӧс: КР энциклопедия, 1 том, 285 лб.
Вокуев Федор Петрович (01.01.1950-21.10.2000) – самодеятельнӧй поэт, композитор. Чужліс Кельчиюр сиктын. Помаліс Нарьян-Марса педучилище, Ленинградса связь электромеханическӧй институт. Уджаліс музыкальнӧй уджалысьӧн Изьвавом (Усьте) школаын, Кельчиюрса да Галфедьса детсадъясын. Гижис 20-ысь унджык челядьлы сьыланкыв, челядьлы шылада мойд, некымын сьыланкыв верстьӧяслы. «Тільгӧ лов пытшкын…» сборниклӧн автор (2000 год). Котыртіс медводдза фольклор коллектив Кельчиюрын, ӧні сійӧ нималӧ став Изьва районын. Ӧшмӧс, ӧшмӧс.
Рочев Василий Прокопьевич (28.06.1952) – коми сьылысь, Коми Республикаса нимйӧза артист, Коми Республикаса нимӧдана уджалысь. Чужис Няшабӧж сиктын. Помаліс Сыктывкарса шылад училишӧлысь сьылан юкӧн. Сьылӧма «Асъя кыа» канму ансамбльын, Коми республикаса шылад театрын, уджалӧма Коми Республикаса филармонияын. 1995 воын лӧсьӧдіс ассьыс ансамбль «Мелi шыяс». Уджалан воясӧ ансамбльыс дасьтіс и сетіс 25 концерта программа Коми сиктъясын да каръясын, Москваын, Финляндияын, Германияын. Уна во чӧж веськӧдліԍ Сыктывкарын изьваса йӧзкостса культура шӧринӧн. Тайӧ шӧринлӧн эм аслас сьылан «Изьва» ансамбль, сійӧс сідзжӧ котыртіс В.П. Рочев. Ӧшмӧс.
Савенко Ольга Николаевна (11.09.1956) – тележурналист, Россия Федерацияса культураын нимӧдана уджалысь, Коми Республикаса культураын нимӧдана уджалысь. Уджалӧ «Коми гор» телерадиокомпанияын тематическӧй вешанньӧ службаса начальникӧн. Чужис Усинск районса Лыжавомын. Коми войтырлӧн традицияяс да культураяс йылысь фильмъяс дасьтӧмысь шедӧдӧма Коми Республикаса канму премия. «Финно-угорский мир» телеуджтасысь сылы сетӧма Коми Республикаса Веськӧдлан котырлӧн премия. Войтыркостса да ставроссияса унасикас телефестивальӧ да конкурсӧ пырӧдчысь. Ӧшмӧс: КР энциклопедия, 3 том, 10 лб.